Paingon nga manulis duha ka “tulisan” nangadakpan

CEBU, Philippines - Nasikop sa kapulisan sa siyudad sa Talisay ang duha ka gipasanginlang tulisan nga sakop sa Jeffry Caparida Group diha sa barangay Biasong.

Ang mga dinakpan mao sila si Christopher Deiparine, 26 , ug si Joel Tornate alyas Jojo, 31, pulos taga Linao, Talisay.

Matud pa ni Superintendent Germano Mallari, hepe sa kapulisan sa maong siyudad nga si PO2 Dennis Ricafort gisumbungan sa iyang mga silingan bahin sa duha ka tawo nga kadudahan og lihok ug adunay nagbagal sa ilang mga hawak nga gituohang armas.

Si Ricafort daling nangayo og backup sa ilang buhatan hinungdan sa pag-abot nila ni Inspector Windell Abellana, PO3 Edwin Campomanes, PO3 Ferdinand Pablo ug SPO1 Sebellita.

Si Mallari nibutyag nga wa makabantay ang mga suspek sa pagbutho sa mga polis ug wala makasukol dihang gipangrekisa.

Nakuha gikan kang Deiparine ang .45 nga armas nga may pito ka bala; granada; duha ka medium packs ug lima ka sachet sa shabu samtang kang Tornate mao ang .38 nga revolver nga adunay unom ka bala; duha ka medium packs ug 10 ka sachet sa shabu. Ang maong drugas mobalor og P247,800.

Matud pa ni Mallari nga ang dinakpan kauban sa grupo nga responsable sa mga pagpanulis sa mga ahente og softdrinks.

Gani usa sa mga nabiktima ang nipatim-aw sa buhatan sa kapulisan sa Talisay ug miila sa mga suspek nga mao ang mitulis kaniya diha sa Urgelio Street siyudad sa Sugbu niadtong Huwebes sa hapon.

Gituohan nga niadtong tungora dihang gidakop ang duha, plano nilang tulisan ang lain na usab nga ahente sa softdrinks nga niabot sa lugar.

"Posible to nga motulis ang duha sa tindahan or kato bang ahente ang ilang giatangan," matud pa ni Mallari.

Sumala pa ni Mallari nga gawas sa pagpanulis, nalambigit usab ang grupo sa ilegal nga drugas ug guns for hire, sila mga sakop sa gipasanginalng notadong lider sa mga tulisan nga si Jeffry Caparida. Si Caparida nadakpan human nakigpinusilay sa mga polis ug padayon karong nag-atubang og mga kaso. (Gabriel Bonjoc/EIM)(BANAT NEWS)