Unom naangol sa duha ka aksidente

CEBU, Philippines – Unom ka tawo ang nangaangol sa duha ka kaso sa panagbangga nga pulos gikalambigitan sa Ceres Bus sa habagatan ug amihanang bahin sa lalawigan sa Sugbo.

Sa dakbayan sa Naga, upat ka tawo ang nangaangol human nagkabangga ang usa ka armored van ug Ceres Bus diha sa barangay Cayam kagahapon sa buntag.

Ang aksidente miresulta sa grabeng paghuot sa traffic nga nakapungot sa mga motorista.

Ang mga drayber sa isig ka sakyanan ang nangaangol lakip ang sakay sa armored van maayo na lang gani kay walay nasamdan sakay sa bus.

Ang drayber sa Ceres bus nga nagtangag sa plakang GXV-250 mao si Editho Hamboy, taga Sinaguing, Ramon Magsaysay, Zamboanga del Sur samtang sa armored van nga adunay plakang AAC-3375 mao si Junrey Caballero nga taga Mantayupan, lungsod sa Barili.

Ang laing duha nga naangol mao ang escort niya nga sila si Noel Labrador, 37, ug Edgar Geminez, 27, ang mga nasamdan gidala sa South General Hospital sa maong dakbayan.

Sumala pa ni Superintendent Ricky Delelis, hepe sa Naga Police Station pulos paingon sa dakbayan sa Sugbu ang duha ka sakyanan.

Matud pa niya nga nag-una ang van apan gikatahong kalit kining milatay sa center island maong nadasmagan sa nagsunod nga bus. Tungod sa kusog nga impact nagusbat ang duha ka sakyanan.

Samtang grabeng naangol sila si Nelson Salar, ug Joseph Allan Lumapas, 32, human nadagit ang ilang gisakyang motorsiklo sa Ceres Bus nga nagdala sa plate number nga GXN 856 diha sa barangay Tagnocan, Borbon.

Si Police Officer 1 Jose Umbay sa Borbon Police Station miingon gikan pa sa dakbayan sa Sugbo ang mga biktima paingon sa amihanan ug nakasugat  nila ang maong bus nga gimaneho ni Julius Cambal Damayo.

Sumala pa ni Umbay misuway og overtake sa gisundang motorsiklo ang mga biktima apan sa paghimo niini nadagit sila sa kasugat nga bus diha sa pikas nga lane.

Ang mga biktima dali nga gidala ngadto sa Juan Dosado Memorial Hospital sa Sogod ug ang drayber sa Ceres Bus mitahan usab ngadto sa kapolisan sa maong lungsod. – /EIM) (BANAT NEWS)