P600 mil nga Laoan lumber gisakmit

CEBU, Philippines - Mga tinabas nga Laoan nga kahoy o naila nga Philippine Mahogany ang gisakmit sa hiniusang operasyon sa Department of Environment and Natural Resources ug Maritime Police sa yarda sa Cebu Liberty Lumber diha sa Lao Singto Street sa barangay Tejero, Cebu City kagahapon sa buntag.

Gibana-banang mokabat og dul-an sa P600 mil ang kantidad sa mga kahoy nga nasakmit nga mokabat og 650 ka tinabas nga tabla nga moabot og 9,372 board feet. Matud pa ni Superintendent Marvin De Paz, sa Maritime Police nakadawat sila og impormasyon gikan sa usa ka kasaligang tinubdan nga dunay mga Laoan nga kahoy ang niabot sa Sugbo gikan sa Leyte, hinungdan nakig-alayon sila sa DENR.

Sumala pa ni Paz, mopahigayon na sila og imbestigasyon kun kinsa ang nagdala niini ug kun asa kini gipamutol aron malakip sa pasakaan og kaso.

Samtang ang forester sa DENR Nolito Lapinig nibutyag sa Banat News nga dunay nahimong kalapasan ang maong establisamento kay ilegal ang maong mga kahoy.

Lakip sa nakitang posibleng nalapas sa maong establisamento ang Presidential Decree 705 ug Executive Order No.23 Series of 2011.

 Si Lapinig nibutyag nga ipatawag nila ang kadagkuan sa Cebu Liberty Lumber alang sa administrative adjudication proceedings aron makapakita sila og mga dokumento kung duna ba kini special order nga gihuptan aron makahatag usab sila sa ilang rekomendasyon kung angay bang iuli ang mga kahoy o hingpit ba nga sirad-an ang maong establisamento.

Suway unta nga gikuhaan sa Banat News ang nagdumala sa maong yarda, apan nagdumili kini pagluwat og pamahayag kay magpaabot pa sila sa ilang abogado. (BANAT NEWS)