Balay sa Apas gilungkab kawatan mamilyonaryo

CEBU, Philippines – Ang mga kawatan nga milungkab sa usa ka balay sa San Antonio Village, Barangay Apas kaniadtong Lunes mahimong mamilyonaryo tungod kay kapin sa P1 milyon ang kantidad sa alahas nga ilang nakuha.

Si John Rian Ruba, 34, midangop sa mga sakop sa Theft and Robbery Section (TRS) sa Cebu City Police Office (CCPO) sa pamasin nga mabawi pa ang mga gikawat gikan sa iyang balay.

Gitug-an ni Ruba ngadto kang TRS Chief David Señor nga ang nakawat gikan sa balay mao ang Rolex watch nga aduna’y diamonds (P700 mil) Armani watch (P20 mil) Bulgari necklace (P150 mil), Rose bracelet (P260 mil) ug bulawan nga kwentas (P20 mil).

Matud ni Señor nga sa ilang pakisusi ang mga kawatan didto miagi sa pultahan sa balkon human nila gub-a ang lock.

Ang mga alahas gikuha didto sa cabinet ug ang kawatan misibat agi sa fire exit sa balay.

Sumala ni Señor nga niadtong Lunes wala’y tawo ang balay gikan alas 3 sa hapon hangtud alas 11 sa gabii kay ang tag-iya didto nag-dinner sa gawas.

Wala ‘sab nila mabantayi dayon nga nabiktima diay sila sa pagpanglungkab atol sa ilang pag-abot. Pagkabuntag na sila nakabantay nga guba na ang lock sa pultahan ug nawala na ang mga alahas.

Ang biktima dili gani mosul-ob sa mga alahas nga hinatag ra ‘sab sa ilang mga higala ug pamilya.

Padayon pa ang imbestigasyon aron pagsuta kinsa ang mga kawatan. – /RUB) (BANAT NEWS)