Mamuhatay og sapatos may bag-ong ekipo
CEBU, Philippines - Gitunol sa Department of Trade and Industry ang P1.3 milyones nga balor sa ekipo sa pagbuhat og sapatos sa Carcar United Footwear Manufacturer's Association Inc. (CUFMAI).
Dul-an na sa 15 ka tuig ang CUFMAI sa mao’ng negosyo ug pinaagi sa bag-ong ekipo gipaabot nga mas modaghan pa ang sapatos nga ila’ng mabuhat.
Ang ekipo naglangkob sa Hydraulic Sole Press, Hydraulic Bench Type Cutting Machine, Heavy Duty Stitching Machine ug Insole Stitching.
Si Samuel Lauron, vice chairman sa CUFMAI ug dul-an na sa 30 ka tuig nga shoemaker, niasoy nga daku ang iya’ng kalipay tungod kay mas dali na ang pagbuhat nila og sapatos ingon man uniporme na ang tanan itandi sa mano-mano.
Matud ni Lauron nga makahimo na sila og usa ka libo ka paresan sa sapatos o sandal matag adlaw gamit ang makina nga gihatag sa DTI.
Si DTI-7 Director Asteria Caberte malaumon nga pinaagi sa mao’ng ekipo mabuhat na ang mga buluhaton nga dili mabuhat kaniadto sa mano-mano ug makatabang usab kini sa 22 ka miyembro sa CUFMAI. Base sa memorandum of agreement, 68 ka indibidwal ang gikinahanglan aron moandar ang tanang makina. (BANAT NEWS)
- Latest
