P37.8M nga gibayad sa Kapitolyo sa Balili lots ipapauli sa korte

CEBU, Philippines - Human sa kapin sa lima ka tuig sa pagpasaka og kasong sibil batok sa pamilyang Balili ang korte mimando sa pagpauli sa P37.8 milyones nga gibayad sa probinsiya sa 94,526 square meters nga nasuta nga bakhawan ug dagat.

Ang probinsiya mibayad og P99.6 milyones sa tibuok luna sa Tinaan, Naga nga gibaligya sa mga Balili apan nasuta sa duha ka survey niadtong Agosto 2009 ug Agosto 15, 2015 nga ang 94,526 square meters niini bakhawan ug nalunod sa dagat.

Tungod niini, mipasaka og kaso si kanhi gobernador Gwendolyn Garcia batok kanila ni Amparo Balili nga asawa ni Luis Balili ug ni Atty. Romeo Balili nga maoy ‘executor of the state’ sa maong luna.

Niadtong Pebrero 16, 2015 si Regional Trial Court (RTC) Judge Raphael Yrastor, Sr. sa Branch 14 miluwat sa maong kamanduan nga ipabalik sa mga Balili ang sobrang gibayad sa probinsya.

Si Atty. Orvi Ortega, provincial legal counsel nagkanayon nga ang mga Balili  duna pa kini 15 ka adlaw sa pagduso sa ilang Motion for Reconsideration o pag-apelar sa nahisgutang desisyon sa korte.

Sa laing bahin, si Atty. Balili mibutyag kagahapon sa mga tigbalita nga sa ilang habig nakahimo na sila sa ilang MR ug gikatakdang iduso nila karong Marso 13, 2015  alang sa pagdungog niini sa Marso 20, 2015. (BANAT NEWS)