Anak naghikog human namatay ang inahan

CEBU, Philippines – Gumikan sa tumang kaguol sa kamatayon sa iyang inahan upat ka adlaw na ang nakalabay, usa ka batan-on ang naghikog gamit ang pisi sulod sa iyang lawak diha sa ilang balay sa Sitio Rotunda Barangay Banilad ning dakbayan sa Sugbo.

Giila ang naghikog patay nga si Jigger Archival, 26, nagpuyo sa maong lugar.

Sumala pa ni Senior Police Officer 2 Rommel Bancog ang imbestigador sa Homicide Section sa Cebu City Police Office nga nahinabi sa Banat News nagdoble karon ang gibati nga kasub-anan sa maong pamilya tungod sa nahitabo.

Wa pa malubong ang inahan human kini namatay gumikan sa ataki sa kasingkasing.

Si Bancog miingon nga base  sa nakuha nilang impormasyon hilabihan kaguol ni Jigger human nga namatay ang iyang inahan.

Niadtong nakalabay nga hapon napalgan na lang sa amahan sa maong lalaki nga nagbitay na sa sulod sa lawak niini ug wala na’y kinabuhi.

Gisulayan pa unta kini og luwas sa amahan apan nakabsan gayod kini sa iyang kinabuhi.

Sa pagsubay sa kapulisan wala sab sila’y nakita nga ilhanan nga duna’y foul play ang maong hitabo. – /EIM) (BANAT NEWS)