Ahente, estudyante, maestra gitulis

CEBU, Philippines - Gikandadohan sulod sa delivery van ang ahente sa sigarilyo kauban sa drayber ug truck boy dihang gitulis sa armadong mga lalaki alas 2 pasado sa hapon niadto’ng niaging adlaw sa sitio Cawayan, Tayud, lungsod sa Liloan.

Giila ni Police Officer 3 Jesson Gayo ang mga biktima nga sila si   Tirso Lauro, 34, taga Tunghaan, Minglanilla; drayber nga si Ramil Tolentino, 28 ug truck boy nga si John Carlo Ocao, 22, taga Bulacao Pardo, dakbayan sa Sugbo.

Gikuha sa duha ka tulisan ang bag nga gisudlan sa P10,000 ug mga cellphones.

Ang mga tawo nga niagi sa maong dapit ang nakamatikod tungod sa ilang pagdukdok sa bongbong sa ilang delivery van.

Samtang nagkurog pa ang duha ka medical technology students nga nahidangat sa buhatan sa kapolisan tungod sa ilang kalisang nga gitionan og armas sa tulisan sa reclamation area, dakbayan sa Mandaue alas 8 pasado ang takna sa niaging gabii.

Ang mga biktima mao sila si Dara Desiree Aliocod, 18, taga dakbayan sa Dumaguete ug Abegail Anaviso, 18, taga Bohol ug pulos tinun-an sa Cebu Doctor’s University.

Matud ni Police Officer 2 Fredielou Quezon nga gikan sa Parkmall ang mga biktima ug samtang naglakaw sa karsada pauli sa ilang dormitory kalit lang gisugat sa duha ka armadong lalaki nga nagtion sa armas dungan ang pagdeklarar nga tulis.

Gikuha ang shoulder bag nga gibutangan sa ilang cellphone, ilang ID ug wala na matino nga kantidad nga salapi nga sulod niini dayun sibat sa mga tulisan.

Laing biktima sa pagpanulis ang maestra samtang nagbarug daplin sa karsada sa sitio Bayong, Yati, lungsod sa Liloan alas 8 pasado ang takna sa niaging gabii.

Ang biktima giila nga si Jonalyn Espina, 36, nagpuyo sa maong dapit.

Gihunongan ang biktima og motorsiklo nga giluwanan sa duha ka wala hiilhing lalaki dungan ang pagtion og armas ug gikuha ang dala nga laptop, cellphone ug  salapi.  (BANAT NEWS)