Pekeng sanitary permits

CEBU, Philippines - Nagtingkagol sa Carbon Police Station ang usa ka kanhi empleyado sa Cebu City Hall human gireklamo nga nangilkil og P1,500 sa tag-iya sa usa  ka fried chicken vendor bugti sa pag-process niini sa iyang sanitary permit.

Si Arante Aranas, 42, taga T. Padilla sa dakbayan sa Sugbo gidakop sa kapolisan tungod sa reklamo sa tag-iya sa Kara’s Chicken nga si Baby Redelosa tungod sa pagbalik-balik sa suspek sa iyang tindahan.

Si Police Officer 3 Mario Nator, desk officer sa Carbon Police Station miingon nga si PO2 Joel Perolina maoy midakop sa suspek.

Si Redelosa nga nahinabi sa Banat News miingon nga niadtong Martes sa hapon miduol kaniya si Aranas ug miingon nga siyay molakaw sa Sanitary Permit sa nauwahi.

Midugang si Redelosa nga nakahibalo na siya sa modus sa suspek tungod kay gisultihan siya sa iyang higala bahin niini apan iyaha lang kining gisakyan.

Giingong gipangayoan siya ni Aranas og P1,500 ug gipapirma niya kini og kasulatan nga nadawat niya ang kwarta ug kagahapon, dihang mibalik kini mitawag dayon siya og polis.

Diha sa Carbon Police Station nakuhaan ang suspek og usa ka pakete nga shabu, mga peke nga papeles ug duha ka peke nga identification cards sa Cebu City Hall nga managlahi og ngalan apan iyaha ang mga litrato niini.

Si Aranas nga nahinabi sa Banat News mihimakak sa maong pasangil ug miingon nga ang empleyado ni Redelosa ang mihangyo kaniya nga siya na lang ang molakaw sa papeles sa tindahan.

Giangkon hinuon niya nga iyaha ang mga ID ug ang mga papeles apan gihimakak niya nga duna siyay dalang usa ka paketeng shabu. Pasakaan og kasong kalapasan sa Comprehensive Dangerous Drugs Act of 2002, extortion ug falsification of public documents ang suspetsado.

Kahinumdoman nga ning bag-ohay lang, daghang mga establisamento ang nasakpang mga peke ang ilang sanitary permits. (BANAT NEWS)