Duha gipusil, usa kanila patay

CEBU, Philippines - Patay diha-diha dayon ang usa ka lalaki human kini gipusil kagahapon sa buntag didto sa Sitio Kagudoy, Barangay Basak, dakbayan sa Lapu-Lapu samtang naangol ang laing tawo nga gipusil didto sa Barangay Magay, Compostela niadto’ng Domingo.

Ang gipatay didto sa Lapu-Lapu mao si Ryan Amores, 39, wala’y trabaho ug nagpuyo sa Barangay Basak, samtang ang naangol human pusila didto sa Compostela giila nga si Aldwin Cuervo, 38, taga Barangay Magay.

Matud ni Inspector Zenaido Pastorfide nga maoy hepe sa Lapu-Lapu City Police homicide section nga si Amores nagtindog lang daplin sa karsada sa Sitio Kagudoy ug giingong adunay gihuwat.

Ang wala hiilhi nga tawo nga nagluwan og motorsiklo miagi sa nahimutangan ni Amores ug mihunong kini sa unahan. Ang angkas nanaog gikan sa motor ug giduol si Amores dayon gipusil.

Si Amores naigo sa iyang ulo nga gituohang maoy nakaingon sa diha-diha nga kamatayon samtang nakit-an sa kapolisan didto sa crime scene ang kabhang sa .45 kalibre nga armas.

Didto sa Compostela, giila lang nga usa ka Richard ang mipusil ug miangol sa 38-anyos nga si Aldwin Cuervo. Ang nagpusil kaniya giingon nga taga dakbayan sa Sugbo.

Si SPO2 Pedro Enriquez sa Compostela Police Station miingon nga ang mga nakasaksi sa hitabo mitug-an nga nagbarug lang daplin sa karsada ang biktima diha’ng giduol kini sa suspetsado.

Dugang pa ni SPO2 Enriquez nga nagtuo ang mga nakakita sa maong hitabo nga managhigala ang duha kay nag-estoryahay pa man kini sulod sa pipila ka gutlo sa wala pa pusila ang biktima.

Si Cuervo nakaangkon og pinusilan sa ulo mao nga nahagba kini sa yuta ug dali kaayo nga misibat ang nagpusil kaniya.

Ang samaran nga si Cuervo gidala sa Danao Provincial Hospital apan gibalhin usab kini sa Vicente Sotto Memorial Medical Center sa dakbayan sa Sugbo. Si SPO2 Enriquez miingon nga padayon pa sila nga nag-imbestigar sa hitabo. (BANAT NEWS)