Turista gikawata’g P1M alahas

CEBU, Philippines - Kapin sa P1 milyon nga kantidad sa alahas ug kwarta ang gikawat gikan sa bag sa usa ka babaye  nga nagpamasahe sa usa ka beach resort sa lungsod sa Santa Fe .

Igo na lang sa pagdangop sa kapolisan ang biktima nga si Elizabeth Tamparong Custodio, 25, taga Quezon City, kinsa mibakasyon uban sa iyang igsuon nga si Estrella Custodio diha sa maong beach resort.

Giingong nagpamasahe ang biktima sa usa ka massage therapist sa resort nga si Jellyn Zapar Pacinio, 27.

Si Pacinio gikatahong mihangyo nga undangon na lang ang pagmasahe kay kapin usa ka oras na niya kini gibuhat kang Custodio. Si Custodio gikan pa sa kasilyas nianang tungora.

Apan nakurat na lang kini nga abli na iyang bag ug wala na diha ang mga alahas ug iyang cash. Wa na usab igkita sa kapolisan si Pacinio sa balay niini.

Samtang, P235 mil nga balor sa alahas ang nasakiyo sa wa mailhing mga kawatan gikan sa balay sa usa ka Janice Llanos, 37, diha sa Baclay Drive,  Barangay Basak San Nicolas, syudad sa Sugbo.

Giingong miagi sa bintana sa likud sa balay ang mga kawatan. (BANAT NEWS)