Suspek sa lungkab nadakpan

CEBU, Philippines – Nadakpan na sa kapolisan ang suspek sa paglungkab sa usa ka panimalay sa sitio Tabok Lamac, Yati, Liloan alas 8 kagahapon sa buntag.

Si SPO3 Octavio dela Paz sa Liloan Police Station miila sa nadakpan nga si Armando Ortiz Montilla, 36-anyos, wala’y trabaho ug nagpuyo sa maong dapit.

Ang dinakpan gitumbok nga suspek sa paglungkab sa panimalay ni Ronida Gabongco Trininad, 36-anyos, sa maong lugar.

Pinaagi sa pagguba sa door knob sa pultahan, nakasulod ang suspek ug gisakiyo ang duha ka cellphones nga para sa load retail ug P300 nga sinsiyo nga kuwarta.

Matud ni dela Paz nga may silingan nga nakasigpat sa suspek atol sa pagpanglungkab hinungdan nga dali nga nailhan ang suspek. – /GMR) (BANAT NEWS)