Patay gibanlas, tawo gipusil

CEBU, Philippines - Usa ka patay'ng lawas sa wala pa mailhi’ng lalaki napalgan sa sapa sa Sitio Visayan, Barangay Lanas, dakbayan sa Naga sayo kagahapon sa buntag.

Ang patay’ng lawas una nga napalgan ni Carpo Banuman nga maoy mi-report dayon sa kapolisan. Ang ulo sa tawo nakaangkon og samad nga maoy gituohan nga nakaingon sa iyang kamatayon.

Padayon pa nga gisusi sa kapolisan aron mailhan ang maong tawo nga aduna'y gitas-on nga lima ka tiil ug may tattoo sa buko-buko ug sa dughan.

Samtang sa dakbayan sa Danao, tawo nga giingong tig-reflex ug may mga samad-pinusilan ang kalawasan nagpakitabang diha’ng nakit-an kini didto sa water reservoir sa Sitio Caputatan, Guinacot kaniadto’ng Huwebes sa buntag.

Ang lalaki nailhan nga si Eme Noel Almaden, 31, residente sa Catadman, Barangay Sabang, dakbayan sa Danao.

Si PO3 Marlon Remollo sa Danao City Police Station miingon nga usa ka konsehal sa barangay ang nakakita sa biktima nga nagkadugo ang kalawasan ug nangayo’g tabang.

Gituohan nga ang biktima naalaan lang nga usa ka dautang tawo samtang naglakaw-lakaw sa gabii na kaayo mao nga siya gipusil.

Si Almaden nakaangkon og samad-pinusilan sa tiil, walang paa, ug tuo’ng bukton hinungdan nga dali kining gidala sa tambalanan.

Matud pa nga ang biktima mukalit lang og panaka sa kabalayan sa milabay’ng mga adlaw ug mao kini ang rason nga siya gituohan nga dautan. (Jean Lumapas ug Romeo Limpangog/RUB)(BANAT NEWS)