Anak sa katabang nisakiyo sa P59T, mga alahas sa amo

CEBU, Philippines - Nabawi sa kapolisan ang dakung kantidad nga salapi ug mga mahalong alahas gikan sa minor de edad nga lalaki nga misakiyo niini gikan sa panimalay sa 82-anyos nga biyuda sa Sudlon, Maguikay, dakbayan sa Mandaue.

Nadakpan sa usa ka mall sa dakbayan ang minor de edad alas 10 ang takna sa buntag kagahapon.

Ang apo sa biktima nga si Mclemon Go, 29-anyos, ulitawo ang nakataho sa Presinto 4 sa Mandaue City Police Office (MCPO) human sa hitabo hinungdan nga gihimo dayon ang follow-up operation.

Si SPO4 Fernando Gabutero miingon nga ang biktima nga si Francisca Go ang natingala nga abli na ang jewelry box niini ug nahanaw ang mga alahas ug salapi nga nagkantidad og P59 mil nga gisulod niini.

Gisundan sa kapolisan ang minor de edad kinsa nahibaw-an nga misulod sa Pacific Mall sa Ibabao-Estancia sa maong dakbayan nga nagsuroy-suroy na sa pagpamili og mga butang nga iya unta nga paliton.

Dihang girikisa, nakuha ang P59 mil ug mga alahas nga wala pa matino ang kinatibuk-ang kantidad.

Dugang napalgan mao ang upat ka pitaka ug nagkadaiyang matang sa mga resibo sa giprenda nga mga alahas sa usa ka pawnshop.

Si Gabutero miingon nga dugang nilang nahipos nga kasayuran mao nga ang suspek anak sa katabang nga babaye sa biktima ug kanunay na kini’ng mokuyog sa inahan ug motabang-tabang usab sa pagpanglimpiyo.

Gikuha sa minor de edad ang duplicate sa yawe nga didto sa inahan ug mao’y gigamit sa pag-abli sa lawak sa biktima. (Romeo T. Limpangog/GMR)(BANAT NEWS)