Tungod sa ambulansiya, pusher nakaeskapo
CEBU, Philippines – Tungod sa siren sa ambulansiya, naka-eskapo ang usa ka level 2 drug pusher kinsa dakpon na unta kapolisan sa barangay Jampang, lungsod sa Argao sayo niadtong Sabado.
Ang nakaeskapo naila nga si John Vie Arbuladora, 25, ulitawo ug nagpuyo sa maong lugar. Sumala pa ni PO2 Paulino Sanchez nga nahinabi sa Banat News miingon nga taud-taud na nilang gihimoan og pag-monitor si Arbuladora.
Alas 6:30 sa buntag milihok ang kapolisan sa Argao nga gipangulohan sa hepe nga si Police Senior Insp. Alejandro Batobalonos.
Apan ang ilang operasyon nabaraw human nga usa ka ambulansiya sa maong lungsod ang miadto sab sa lugar nga nag-siren dihang may gikuha nga pasyente.
Daling nakasibat ang suspek human nga naka- dungog sa siren sa ambulansiya.
Sulod sa balay sa suspek nakuha sa kapolisan ang duha ka dagkung putos nga plastic nga duna’y sulod nga 10 ka gagmay’ng pakete sa drugas.
Gibana-bana nga ang maong drugas may kantidad nga P112, 000.
Bisan og nakaikyas ang suspek, gitug-an ni Sanchez nga ila gihapon pasakaan og kaso si Arbuladora. -/GMR) (BANAT NEWS)
- Latest
