Shabu ug armas

CEBU, Philippines - Walo ka suspetsado’ng drug pusher nadakpan sa kapolisan ug nasakmitan sila og kapin sa P300 mil nga kantidad sa shabu ug tulo ka armas sa upat ka buwag nga anti-drugs operation.

Si Mannes Ybañez, 23, taga Barangay Tejero maoy nasakmitan og daghang shabu atol sa buy-bust nga gihimo sa mga polis didto sa Villagonzalo II kaniadtong Biyernes sa gabii didto sa balay sa ginikanan sa suspek.

Unom ka bulto nga shabu ug laing 25 ka gagmay nga pakete ang nasakmit gikan ni Ybañez, apil ang P25,180 nga gituohang halin sa ilegal nga drugas. Tulo ka armas, kalibre 45 nga pistola, 380 pistol ug shotgun nga pulos may bala gisakmit usab gikan sa balay nga didto gihimo ang buy-bust. Si Superintendent Romeo Santander, hepe sa Criminal Investigation Branch (CIB), mipasabot nga trabaho g’yud sa kapolisan nga i-search ang balay nga didto gihimo ang pagbaligya og gidiling drugas.

Ang tanang shabu nga nakuha gikan ni Ybañez gibana-bana nga mokantidad og P300 mil. Usa ka opisyal sa barangay mikuwestyon kay nganong gi-search nila ang balay nga dili iya ni Ybañez.

Matud ni Santander nga si Ybañez anaa g’yud sa ilang listahan sa mga drug pushers. May report nga si Ybañez pirme lang pik-apon sa pipila ka sakop sa Waterfront Police apan buhian ra.

May namasangil nga ang grupo ni Santander mikuha og P500 mil gikan sa balay sa ginikanan ni Ybañez, apan si Santander miingon imposible nga aduna niini’ng maong kantidad ang ginikanan sa suspek nga wala man silay trabaho.

Mandaue City

Nadakpan ‘sab ang unom ka tawo nga matud pa mibaligya og shabu didto sa dakbayan sa Mandaue kaniadtong Biyernes.

Si Senior Inspector Miguel Andesa, hepe sa Presinto 2 sa Mandaue City Police Office (MCPO), maoy nangulo pagronda sa panimalay ni Domingo Saberon, 37, sa Sitio Ngolok, Barangay Subangdaku. Gawas ni Saberon, nasikop usab ang laing tulo ka tawo nga sila si Genivil Saberon, 25, Harold Pevida, 34, ug Grace Pevida, 32.

Si RTC Judge Teresita Galanida sa dakbayan sa Mandaue maoy nag-isyu sa search warrant nga nagtugot sa kapolisan nga rondahon ang balay ni Saberon.

Si PO1 Fredielou Quezon miingon nga nasakmit sa balay ni Saberon ang tulo ka gagmay nga paketeng shabu, usa ka medium pack, 10 ka cellphone, ug mga drug paraphernalia.

Bakilid, Mandaue

Duha ka suspetsado’ng drug pusher nadakpan usab sa laing pagpangronda didto sa Sitio Marfa, Barangay Bakilid, Mandaue kaniadtong Biyernes sa gabii.

Si Winston Heyrosa, 41, nga maoy tag-iya sa balay nga gironda sa Sitio Marfa, Barangay Bakilid, nadakpan uban ni Angelie Noynay, 24, dalaga nga taga Barangay Labogon.

Si SPO1 Renato Canja sa Presinto 3 sa MCPO, miingon si Judge Galanida gihapon ang mihatag og pagtugot sa mga polis nga rondahon ang gipuy-an ni Heyrosa tungod kay giingong may gitipigan kini’ng shabu. Nasakmit sa kapolisan ang walo ka pakete’ng shabu.

Si Noynay nga gisukit-sukit sa mga polis nanghimakak og kalambigitan sa pagpayuhot og shabu  ug matud niya igo lang siya nga mibisita kang Heyrosa nga iyang higala.

Lapu-Lapu City

Gidakop sa kapolisan ang usa ka molupyo sa Saac 1, Barangay Buaya, dakbayan sa Lapu-Lapu nga naaktohan nga mibaligya og shabu atol sa gipahigayon nga buy-bust operation kaniadtong Huwebes sa hapon.

Ang nadakpan mao si Arnel Garzano, 23. Si Police Inspector Judith Besas maoy nangulo sa pagpahigayon og buy-bust operation.

Human si Garzano gidakop sa pagbaligya og usa ka pakete’ng shabu, girekisa siya ug nakuhaan og laing siyam ka gagmay’ng putos sa gidiling drugas, mga drug paraphernalias ug ang P200 nga marked money. (BANAT NEWS)