Gikulata sa polis nidangop sa NBI

CEBU, Philippines- Human mitumaw ang report labot sa pagpangulata sa usa ka polis sa dakbayan sa Lapu-Lapu, ang mga biktima midangop sa National Bureau of Investigation.

Kini tungod kay wala na’y salig ang mga biktima sa kapolisan sa dakbayan.

Ang gireklamo mao si Insp. Rogelio Amoroso, pangulo sa Law Enforcement Section sa Lapu-Lapu City Police Office (LLCPO), tungod sa giingong pagpanagpa, nagpabuto sa iyang armas ug nangulata.

Ang insidente nahitabo sa sitio Tangke, barangay Basak niadtong Agosto 1 gumikan sa giingong grabeng kahubog atol sa pagsaulog sa iyang adlaw’ng natawhan.

Sila si Joseph Lumungsod, Dennis Camero ug Gervincnet Manlangit giingong gipangkulata ni Amoroso kinsa mihimakak sa pasangil.

Hinuon iyang giangkon nga taga didto siya sa maong lugar ug nagsaulog sa iyang adlaw’ng natawhan.

Matud ni Lumongsod nga nakahukom sila pagdangop sa NBI-7 tungod kay nahadlok sila nga dili makakuha og hustisya sa kapolisan tungod kay opisyal ang nalambigit.

Nakaseguro ang mga biktima nga si Amoroso gyud ang nanapat kanila.

Ang hepe sa LLCPO, Senior Supt. Armando Radoc, miingon nga iya na nga gimanduan ang Investigation and Detective Management Branch (IDMB) sa paghimo og imbestigasyon sa maong hitabo bisan ang mga biktima didto dangop sa NBI. - /GMR) (BANAT NEWS)