60-anyos napunggit sa motor patay
CEBU, Philippines - Patay ang usa ka lalaki nga nabanggaan og motor pasado alas 6:00 miaging gabii human nabanggaan kini og motor sa Sitio Laray, Barangay San Roque sa dakbayan sa Talisay.
Ang biktima naila nga si Dionesio Reyes, 60, molupyo sa nahisgotan nga lugar. Ang suspetsado naila nga si Benjon Dionson, 30, taga Inayagan sa dakbayan sa Naga.
Si SPO1 Edgar Causon nga usa sa mga niresponde sa maong alarma miingon nga si Dionson sakay sa iyang motor padulong unta sa trabaho.
Kalit lang milabang sa karsada ang maong biktima ug wala na makalikay ang suspek hinungdan nga naigo niya kini.
Ang biktima daling gidala sa iyang mga tagtungod ngadto sa Talisay City District Hospital apan gi-refer ra usab kini sa Vicente Sotto Memorial Medical Center tungod sa grabeng kadaot nga naangkon niini sa iyang lawas.
Samtang ang biktima gidala gilayon sa mga sakop sa Basak Pardo Emergency Response (BPER) sa VSMMC apan gideklarar na kini nga dead on arrival.
Pasakaan og kasong reckless imprudence resulting to homicide ang suspetsado. (BANAT NEWS)
- Latest
