Doktor gireklamo, puya wa atimana

CEBU, Philippines - Kritikal ang kahimtang sa unom ka buwan nga bata human giingong gipasagdan sa doktor sa usa ka infirmary sa lungsod sa Asturias.

Gisulod sa Intensive Care Unit sa Perpetual Succour Hospital tungod sa “‘severe dehydration.”

Midangop sa Banat News ang amahan sa bata nga si Ritchie Torion ug misaysay nga gipasagdan sa doktor ang iyang anak ug wa mahatagi og dextrose sa dihang gidala kini sa infirmary sa maong lungsod.

Gibutyag ni Torion nga nagsuka-kalibang ang iyang anak niadtong adlaw’ng Domingo maong gidala dayon sa infirmary aron pagsusi sa kahimtang niini apan wala ang doktor nga si Zaldy Climaco, ang Municipal Health Officer sa Asturias.

May nakakita kang Climaco sa usa ka buwangan niadtong adlawa. Apan gihimakak ni Climaco nga gipasagdan ang bata ug matud niya nga gitambagan sa nurse ang mga ginikanan nga dad-on sa duol nga district hospital ang bata sanglit wa man siya nianang adlawa.

“Mihuwat gyud sila nako. So, akong giadto. Gipangutana nako ang kahimtang. Akong gitan-aw ang bata, wa may signs of dehydration. Pero pa-obserbahan sa. Diha sila nag-stay sa infirmary, gipatagaan nako og tambal,” matud ni Climaco. Si Climaco nagkanayon nga wala na niya masusi pagbalik ang bata pagka-ugma sanglit aduna siya’y medical mission ug may laing doktor nga nahabilin.

Giklaro usab niya nga doktor siya sa sentro ug wala’y trabaho sa Sabado ug Domingo.

Personal na nako kanang adlawa, way magbuot nako kung asa ko sa Sabado ug Domingo,” matud ni Climaco. Planong mopasaka og kaso ang mga ginikanan sa bata batok sa doktor. (/GMR)(BANAT NEWS)