2 anak gidunggab

CEBU, Philippines - Pulos samaran nga nangalandig sa tambalanan ang duha ka managsuon human nakigdinunggabay sa ilang amahan sulod sa ilang panimalay pasado alas-8 sa miaging adlaw sa Barangay Duljo, dakbayan sa Sugbo.

Giila ang mga biktima nga mao sila Carlo Cañas, 26, ug Charisse Cañas, 24, samtang ang suspetsado mao ang ilang amahan nga si Carlos Cañas, 54, pulos nagpuyo sa maong dapit.

Matud ni PO1 Marichu Buling sa Homicide Section sa Cebu City Police Office nga nahinabi sa Banat News nga samtang nauli sa trabahoan si Carlo naabtan niyang naghilak si Charisse kay diay giayo og kasaba ug giinsulto sa suspek, matud pa kalit nga migawas ang suspek ug giapil og kasaba si Carlo hinungdan sa ilang panagsumpaki.

Sumala pa nga naglumbaanay si Carlo ug ang ilang amahan pagkuha og kutsilyo sa kusina ug diha nahitabo ang ilang dinunggabay. Si Charisse misuway og pakgang sa duha apan nadunggaban kini sa paa, samtang nadunggaban sa dughan ug bukton si Carlo.

Daling gidala ang managsuon sa Cebu City Medical Center samtang gidakop ang suspek. Apan matud pang SPO4 Rey Cuyos sa Homicide Section sa Cebu City Police Office nga mihangyo ang mga anak nga pagawson na lang ang ilang amahan. (BANAT NEWS)