Magsuong tindero gipadakop sa amo
CEBU, Philippines - Gipadakop sa ilang amo ang iyang mga trabahante nga magsuon human giingong mikuha sa mga baligya sa iyang tindahan ug wala na mobalik sa ilang trabaho.
Ang mga dinakpan naila nga sila si James Tutor, 18, Angelo Tutor, 20, ug usa ka menor de edad kinsa gitugyan na ngadto sa Women and Children Protection Division (WPCD) sa Cebu City Police Office.
Matud ni Chief Insp. Noel Lomente nga miduol sa ilang buhatan ang usa ka Genalyn Isanan, tag-iya sa usa ka tindahan, ug nangayo og tabang batok sa iyang mga trabahante.
Mga sinaligan sa tindahan ang mga suspek kinsa gitugotan nga makadala sa mga baligya ug maninda sa ubang lugar.
Pipila na ka adlaw ang nakalabay wala na mobalik ang mga trabahante aron pag-remit sa halin ug nahibaw-an sa amo nga didto na sa dakbayan sa Lapu-Lapu namaligya.
Sa follow-up operation sa kapolisan, nasikop ang tulo apan nakaikyas ang usa ka kauban nga si Bryan Tutor.
Nakuha sa kapolisan gikan sa mga dinakpan ang mga gamit baligya sama sa tsinelas, bull caps ug mga senina nga mobalor kapin sa P15 mil.
Gitanggong na sa Carbon Police detention cell ang mga suspek samtang gipangita ang kauban nila nga nakasibat. (BANAT NEWS)
- Latest
