Level 2 “pusher” nadakpan sa CAIDSOTG

CEBU, Philippines - Nasikop sa City Intelligence Branch (CIB) ug City Anti-Illegal Drugs Special Operation Task Group (CAIDSOTG) ang gipasanginlang level 2 drug pusher sa Barangay Suba, Cebu City sa miaging gabii.

Ang nasikop mao si Restiel Amigable, alyas “Titus”, 24, nagpuyo sa maong lugar.

Si Superintendent Romeo Santander nga nahinabi sa Banat News, mitug-an nga taod-taod na nilang gi-monitor ang kalihokan ni Amigable.

Dunay nakuha nga impormasyon ang kapulisan nga duna’y daku nga shipment sa drugas ang maabot sa suspetsado hinungdan nga giplano gilayon sa mga operatiba ang usa ka buy- bust operation.

Human nga nagpositibo ang gihimong test buy gisunod gilayon ang pagsignit kang Amigable.

Nakuha kaniya ang tulo ka dagkong putos, upat ka medium sized ug upat ka gagmay nga pakete nga gidudahang shabu nga may street value nga P250 mil.

Nakuha sab sa kapulisan ang duha ka digital nga timbangan, cash nga P1,170 nga gituhoan nga halin sa iyang ilegal  nga negosyo.

Matod pa ni Santander nga duna’y usa ka pangalan nga gitug-an sa dinakpan nga maoy naghatod kaniya sa maong drugas ug giingong usa kini ka druglord nga naglihok sa maong lugar.

 “Outside Cebu City gikan ang drugas, naa siya’y gitug-an nga pangalan nga posibling druglord, ato nang gi-check,” matod pa ni Santander.   (BANAT NEWS)