Clustering sa mga barangay sa Toledo ipatuman

CEBU, Philippines - Nagtinguha ang hepe sa Toledo Police Station nga grupohon ang mga barangay isip pagsulbad sa kakuwang sa mga polis ug sakyanan.

Giawhag sa hepe nga si Chief Insp. Michael Anthony Bastes ang mga barangay officials nga makigtambayayong sa kapolisan sa pag-cluster sa mga barangay.

Matag cluster langkuban sa tulo ngadto sa upat ka barangay. Ang dakbayan sa Toledo adunay 38 ka mga barangay sa kinatibuk-an.

Dugang ni Bastes nga sa maong paagi mapatuman ang kahapsay ug seguridad sa mga residente sa matag barangay bisan pa man sa kakuwang sa sakop sa kapolisan sa siyudad.

Matud ni Bastes nga matag cluster adunay usa ka pulis ang ibutang kauban ang mga barangay tanod panahon nga mopahigayon sa pagpatrolya.

Ipatuman usab ang matag gabii nga pagpatrolya sa kapolisan ug tanod sa kabarangayan nga masakop sa maong clustering.

Nasayran nga naglisud sa ilang pagpatrolya ang kapolisan sa Toledo sanglit hangtod karon guba gihapon ang ilang patrol car.

Personal nga motorsiklo ang gigamit sa pipila ka pulis sa ilang pagpatrolya. (/GMR)(BANAT NEWS)