LCPO nanghatag og mga school supplies sa isla

CEBU, Philippines - Nangapud-apod ang kapolisan sa Lapu-Lapu og mga school supplies alang sa mga bata sa Pangan-an Elementary School nga nahimutang sa isla sa Pangan-an kagahapon sa buntag.

Si Lapu-Lapu City OIC Police Office Director Senior Superintendent Armando Radoc maoy personal nga mitunol sa maong mga gamit ngadto sa mga bata.

Matud pa ni Radoc nasayod silang dunay daghang mga "less fortunate" nga mga kabataan sa maong isla ug silang mga polis sama sa ubang mga pribado ug publikong ahensya o kompanya adunay social responsibility sa komunidad.

Ang mga sakop sa Police Community Relations o PCR maoy nakahunahuna sa maong proyekto nga gisuportahan sa mga sakop sa Lapu-Lapu City Police Office. Tanang pulis mihatag og 50 pesos pataas matag usa kanila agi og suporta sa maong proyekto.

 Adunay 500 kapin ka mga bata nga nahatagan sa maong school supplies sa maong tunghaan gikan sa kindergarten ngadto na sa grade six.

Samtang si Marilou Pasilan ang principal sa maong tunghaan nalipay sa regalo sa kapolisan  sa ilang mga tinun-an tungod kay daghan pa sa mga bata ang wa pay mga gamit tungod sa kanihit sa kwarta kay mas importante nila ang pagkaon matag adlaw. (BANAT NEWS)