P1 billion nga pundo alang sa PDRRMO
CEBU, Philippines — Aduna pay gibana-bana nga usa ka billion (P1 billion) nga pundo ang Probinsya sa Sugbo alang sa disaster preparedness and response niini.
Kini ang gibutyag ni Provincial Administrator Ace Durano, diin suma niya ang maong pundo mahimong magamit sa Provincial Disaster Risk Reduction and Managment Office (PDRRMO) kun hingpit na kini nga mahimong independent nga buhatan sa Kapitolyo.
Sumala sa Kapitolyo, adunay P628 million natipon nga pundo nga anaa karon nakabangko sa trust fund. Ang maong kantidad mao ang 1% nga share o gahin sa Probinsya gikan sa National Tax Allocation (NTA) sukad tuig 2022.
Samtang aduna pa usab P372 million nga nahabilin sa gahin karong tuiga alang sa disaster preparedness ug response sa Probinsya.
"Tungod kay wala nay gamit-gamit for so many years, naabot na og billion" matod ni Durano.
Ang maong pundo magamit ra sa Kapitolyo kon adunay pagtugot gikan sa hunta probinsyal.
Sa pagkakaron, giuna ang proseso sa paghimo sa PDRRMO isip usa ka independent nga buhatan, sanglit ang PDRRMO usa pa man ka division ubos sa opisina sa gobernador.
Matud ni Durano, pinaagi sa maong pundo, maka-hire og dugang mga responders ang PDRRMO ug makapalit og dugang mga ekipo nga magamit panahon sa kalamidad.
Si Dennis Pastor ang hepe sa PDRRMO miingon nga ang ilang opisina sa pagkakaron duna ray tulo ka emergency responders ug kulang pa kaayo gikan sa dili momenus 21 unta ka emergency responders nga kinahanglan aron mahimong epektibo ug dali nga makatubag sa emerhensiya ang disaster office.
Kinahanglan na usab nga pulihan ang mga ekipo sa PDRRMO tungod kay karaan na kini. (BANAT NEWS)
- Latest
