P11.77 bilyones gigahin sa school feeding program
CEBU, Philippines — Kapin sa P11.77 bilyones ang gigahin alang sa gipalapad nga School-Based Feeding Program (SBFP) karong tuiga, aron mahatagan ang tanang tinun-an sa kindergarten sa publikong eskwelahan lukop nasud og libreng pagkaon matag adlaw.
Matud ni Education Secretary Sonny Angara, ang SBFP nagtinguha sa pagsumpo sa malnutrisyon paingon sa mas paspas nga pagkat-on sa mga bata.
Ang programa ipatuman sulod sa 120 ka adlaw sa ting-eskwela ug karon naglangkob sa tanang mga bata sa Kindergarten, dili lang kadtong kulang sa timbang.
Sa unang higayon sa kasaysayan sa DepEd, ang programa maghatag og init nga mga pagkaon ug fortified food products ngadto sa gibana-bana nga 3.4 milyones ka mga tinun-an sa Kindergarten ug "severely wasted ug wasted" nga mga bata sa Grade 1 hangtod 6.
Sumala sa rekord sa ahensya, anaa sa P11.77 bilyones ang alokasyon sa gobiyerno alang ning programa para sa tuig 2025 ug dunay gisugyot nga P14 bilyon para sa 2026.
Matud sa DepEd, gipalapadan kini gumikan sa nindot nga resulta niini niadtong niaging tuig diin nikunhod og kapin sa 50 porsiyento ang kinatibuk-ang ihap sa severely wasted nga Kindergarten learners— gikan sa 113,451 ngadto sa 47,281.
Segun sa tahu sa mga principal namatikdan nga tungod sa programa, mas abtik, interactive sa klase ug mas andam nga mokat-on ang mga estudyante, ug nadungagan sab ang ilang timbang ug kinatibuk-ang kahimsog.
Aron mas mapalig-on pa ang programa, gitukod ang mga estruktura sa SBFP, ug kapin sa 44,000 ka tunghaan ang aktibong niapil sa Gulayan sa Paaralan Program, inubanan sa tabang sa mga magtutudlo, ginikanan, mga local government units, Department of Health (DOH), Department of Social Welfare and Development (DSWD), ug uban pa. (BANAT NEWS)
- Latest
