Killer sa ginang gisusi kun apil sa ubang kaso

CEBU, Philippines - Ang Provincial Investigation and Detective Management Branch ug ang Balamban police misusi karon sa uban pang mga kaso sa pagpanulis ug pagpangawat sa kabalayan sa Midwest Cebu area sa pagtuo nga ang mga tulisan kinsa mitulis-patay sa usa ka ginang niadtong Domingo sa kaadlawon sa Barangay Buanoy, Balamban duna say kalambigitan niini.

Matud ni Senior Inspector Ramil Morpos, PIDMB investigator, nga dako ang posibilidad nga ang maong tulisan nalambigit na sa nagkadaiyang pagpanulis sa kadalanan sa Balamban, Asturias, Tuburan, ug Toledo City.

Sa iyang bahin, si Chief Inspector Richard Oliver, ang hepe sa Balamban police station miingon usab nga gawas sa pagpanulis usa usab ka drug personality si Cesar Carmelotes.

Si Carmelotes, 43, taga-Sitio Laray, Buanoy, nagtingkagol na karon sa karsel mihimakak   labot sa pagtulis ug pagpatay kang Jonalyn Abendan, 40, bisan pa man kung positibo siya nga giila sa 14-anyos nga anak sa biktima.

Ang dalagita mitug-an sa kapolisan nga igo lang nagpurong sa iyang ulo si Carmelotes ug wala matabuni ang nawong niini mao iyaha kining nailhan, samtang ang usa nag-bonnet.

Ang mga tulisan misulod sa balay pinaagi sa pagguba sa wooden grill sa kusina sa balay sa biktima ug ang manag-inahan gigapos ug gidala sa kasilyas ug human makuha ang ilang tuyo ug wa nay ikahatag ang mga biktima gidunggab ni Carmelotes ang inahan nga Abendan kapin baynte ka higayon.

Nadala sa mga suspek ang  P40,000 nga kwarta ug mga gadgets sa mga biktima.

Ang kapolisan sa Balamban nagduda nga daan nang gipanid-an sa mga tulisan ang pamilyang Abendan ilabi na ang paglarga og balik sa padre de pamilya ngadto sa Australia niadtong milabay’ng semana.

Kasong robbery with homicide ug child abuse ang ipasaka sa kapulisan batok sa duha. (BANAT NEWS)