Dress Code sa City Health Office sa Lapu-Lapu anti-poor — Radaza
CEBU, Philippines - Gihulagway ni Lapu-Lapu City Mayor Paz Radaza nga anti-poor ang pagbutang og karatula sa pultahan sa City Health Office nga nagpatuman og "dress code" sa mga mosud ug gawas sa maong buhatan.
Pipila na ka reklamo ang nadawat ni Radaza ilabi na ang gikan sa isla sa Olango kalabot sa maong kamandoan nga giimplimentar ni City Health Officer Dr. Rodolfo Berame nga dili makasud sa maong buhatan kung magsul-ob og short pants, sleeveless ug tsinelas.
Si Berame sa iyang bahin mipadayag nga sa wala pa niya kini buhata iya na kining gipangutana sa City Legal Officer ug mihatag kini og pagtugot.
Matud pa ni Berame daghan ang mga tawo nga mosud ug gawas sa ilang buhatan nga walay tuyo ug mag-standby lamang sa sulod.
Hinuon sa unang higayon ila kining pasudlon ug pasidan-an nga sa sunod niining balik sa maong buhatan kinahanglan mosunod na sila sa maong dress code.
Apan si Radaza wala makahibalo sa maong dress code ug iya kining ipatawag kalabot sa maong issue. Gusto sa mayor nga ipatangtang kini.
Matud pa ni Radaza ang mao untang buhatan maoy dangpanan sa mga basic needs sa mga Oponganons kalabot sa ilang panglawas ug usa kini sa public place nga open alang sa tanan.
Gani gihimo pa ni Radaza ang iyang buhatan nga ehemplo nga makasud ang bisan kinsa ug bisan unsa pa ang suot niini nga gustong makigkita kaniya. (BANAT NEWS)
- Latest
