101 na ka kawani sa barangay ang adik

CEBU, Philippines -  Miabot na og 101 ka mga kawani sa barangay ang nagpositibo sa ginadili nga druga atol sa gihimong surprise drug test sa 30 ka mga barangay sa dakbayan sa Sugbo.

Namahayag si Dr. Alice Utlang, hepe sa  Cebu City Office for Substance Abuse Prevention (COSAP) nga bag-o lang sila mipahigayon og drug test sa barangay Malubog ug Barangay Babag ug duha ang nagpositibo nga mga kawani sa barangay Babag gikan sa 70 kapin nga ilang nakuhaan og drug test.

Kining duha ka BHW o mga barangay health workers sa barangay Babag nga pulos babaye nagpositibo sa shabu.

Samtang sa barangay Malubog, negatibo ang 56 ka mga kawani, hinuon naa pay upat kanila ang wala pa nakuhaan og drug test ug kung kani sila mag-negatibo, mahimo na unyang ikapito kini nga barangay nga madeklarar nga drug-free workers. Gikan sa 30 ka mga barangay sa dakbayan sa Sugbo nga nahimoan na og drug test, unom na ka mga barangay ang nadeklara nga drug-free workers.

Nag-una niini ang barangay Budlaan, Taptap, Talamban, Pulangbato, Agsungot ug Buhisan. Maapil na unya sa lista ang barangay Malubog kung ang upat nga wala pa nakuhaan og drug test magnegatibo ang resulta.

Tumong sa COSAP ang pagpatuman sa balaod sa pagpugong, pagpahunong ug pagminus sa paggamit sa mga ginadili nga drugas dinhi sa dakbayan sa Sugbo.  (FREEMAN)