CEBU, Philippines - Aron sa pagsiguro nga adunay igong suplay sa tubig nagtinguha ang Toledo City Water District (TCWD) sa pagpangita og dugang tinubdan alang sa mga konsumidor sa silangan nga bahin sa dakbayan sa Toledo.
Matud ni TCWD General Manager Raul Abellana nga project priority nila karon sa ilang buhatan ang pagpangita og tinubdan sa tubig diin adunay tulo ka mga potential sites nga ila nang napanglantawan nga kakuhaan niini aron mosuplay og igong tubig sa barangay Cantabacco, Don Andres Soriano (Lotupan), Poog, Media Onse ug barangay Magdugo. Sa pagkakaron, nagpadayon pa ang pagparehistro sa mga benipisyaryo sa water subsidy program sa lokal nga kagamhanan sa dakbayan. Sila hatagan og P156 nga minimum nga pangbayad sa tubig kada buwan.
Ang maong programa tinguha ni Toledo City Mayor John Henry Sonny Osmeña nga makahatag og libreng tubig sa mga taga Toledo labi na alang sa mga kabos. (/EIM)(BANAT NEWS)