Walo ka polis sa Talisay bag-ong sakop sa SWAT

CEBU, Philippines - Walo ka mga polis sa dakbayan sa Talisay ang napiling bag-ong sakop sa Special Weapon and Tactics (SWAT) human napaubos sa bansay-bansay.

Kini ang gibutyag ni Supt. Reycel Carmelo Dayon, hepe sa Talisay City Police Station.

Apan matud ni Dayon nga nagkinahanglan pa sila og mga ekipo ug sakyanan alang sa SWAT aron makatubag og mga alarma.

Gibanabana nga mokabat ngadto sa P250 mil ang gastohon sa pagpamalit sa ekipo sa matag usa ka sakop SWAT, sumala pa ni Dayon.

Matud ni Dayon nga nanawat na og mga bidders ang kagamhanan sa syudad aron mo-supply sa mga ekipo ug uban pang kagamitan sa SWAT.

Gitinguha nga ang katunga nga bahin sa nahimutangan sa detention cell ubos sa City Hall ang himoon buhatan sa SWAT.

Ang Cebu Provincial Police Office (CPPO) ang nagpasiugda sa pagbutang og SWAT Team sa matag component city.

Gibutyag ni Dayon nga matag siyudad nagkadaghan ang mga tawo samtang nagkadaghan usab ang alarma nga ilang tubagon.

Kini ang hinungdan nga nagkinahanglan sila og espesyal nga grupo sa kapolisan nga motabang sa pagtubag sa alarma ug ubang mga emerhensiya.  (BANAT NEWS)