Gimartilyo sa ulo patay

CEBU, Philippines - Patay ang usa ka construction worker nga gibunalbunalan og martilyo sa  ulo sa iyang kauban sa gitrabaho nilang Aboitiz Building sa sulod sa compound sa City Central School, Barangay Centro, Dakbayan sa Mandaue alas-4 pasado ang takna sa hapon niadtong Domingo.

Ang biktima mao si Julius  Pleños, 26, taga Barangay San Isidro, Lungsod sa San Francisco, Isla sa Camotes samtang ang suspetsado mao si RJ  Formentera, 21,  kauban niya nga construction worker ug silingan usab niini sa probinsya.

Si PO2 Earl Fomador sa kapolisan sa Presinto 1 sa Mandaue City Police Office (MCPO) miingon nga base sa impormasyong gibutyag kanila sa kauban sa duha nga si Aljon Nodalo, nagkabingkil ang duha kabahin sa ilang trabaho nianang tungora nga misangko sa mainitong panaglalis.

Matud pa ni PO2 Fomador nga dihang mitalikod ang biktima sa iyang paglingkod kalit kining giduol sa suspetsado ug gimartilyo ang ulo niini nga nakaingon sa grabeng kadaut nga miresulta sa kamatayon sa biktima.

Dihang nakita na sa suspetsado nga nahagba  ang biktima nagdali kini sa paggawas sa compound ug wala na maabti sa mga polis nga mitubag sa alarma. (BANAT NEWS)