Dunay konsehal sa Talisay dili kumbinsido sa rason ni Mabunay
CEBU, Philippines - Wala makontento ang ubang konsehal sa dakbayan sa Talisay sa pagpasabot ni City Budget Officer Edgar Mabunay kabahin sa gigastohan sa P2 milyones nga budget nga gigahin sa 2014 Sinulog sa Kabataan.
Si Mabunay gipaatubang kagahapon sa buntag atol sa sesyon sa konseho ug gisukit-sukit sa P300 mil nga daog sa Talisay City contingent pagsalmot sa Sinulog nga iyang gigasto.
Nakadaug usab ang mga tinun-an og P50 mil diha’ng nadeklarar nga Best in Costume apan wala usab ihatag sa mga tinun-an.
Si Konsehal Aldin Diaz nga gihatagan og executive power sa mayor isip chairman sa committee on tourism, mikwestiyon sa pagbuot-buot ni Mabunay sa paggasto sa kwarta nga wala mopahibalo sa komitiba.
Mikwestyon usab si Diaz kay hangtud karon wala pa mabayari ang organizer sa kasadya sa Talisay.
Kabahin sa Kasadya sa Talisay, matud ni Mabunay nga wala kini valid appropriation ug nagkinahanglan pa og supplemental budget ug nagsige pa sila og pangita’g laing pundo nga magamit sa miaging tuig.
Matud ni Diaz nga wala siya matagbaw sa pagpasabot ni Mabunay.
Si Konsehal Doroteo Emit nga miyembro sa committee on tourism miawhag ni Mabunay nga mosumitir kanila og kopya sa ilang monthly report aron mawala ang mga pagduda. (BANAT NEWS)
- Latest
