Duha ka tawo nga naghupot og shabu nasikop

CEBU, Philippines -  Nagtingkagol karon sa prisohan sa Danao City Police Station ang usa ka babaye human nasakmitan og 23 ka pakete’ng shabu atol sa buy-bust operation sa kapolisan didto sa Barangay Maslog niadtong Lunes sa gabii. Ang nadakpan sa grupo sa kapolisan nga gipangulohan ni PO3 Phil Restauro mao si Aileen Cruz, 38 anyos, nagpuyo sa maong dapit.

Si PO3 Rocelo Campo miingon nga nakadawat sila og mga taho labot sa ilegal nga kalihukan sa suspetsado hinungdan nga mihimo dayon sila og buy-bust operation.

Gidakop si Cruz human siya mitunol og usa ka pakete’ng shabu ngadto sa police decoy ug midawat sa P500 nga marked money.

Laing 22 ka paketeng shabu ang giingon na-recover gikan sa suspetsado human siya madakpi.

Sa laing bahin, si Mark Neil Pono, 25, taga Purok Santan, Barangay Opao, dakbayan sa Mandaue gitanggong usab sa detention cell human naimbargohi sa mga polis og duha ka paketeng shabu niadtong Lunes sa buntag.

Matud pa ni PO1 Marlowe Binangbang sa Presinto 5 sa Mandaue City Police Office (MCPO) nga naghimo sila og pakisusi diha sa nahisgutang dapit labot sa nahitabong pagpangawat ug  nasigpatan nila ang suspetsado nga katahapan kaayo ang lihok hinungdan nga ila kining gisita.

Matud pa nga sa ilang pagrekisa nakaplagan nila gikan sa bulsa sa suspek ang gidili nga drugas sulod sa kaha sa posporo.

Ang duha ka suspetsado mag-atubang og kasong kalapasan sa Dangerous Drugs Law.”  (BANAT NEWS)