Polis nga nanion sa iyang hepe nag-atubang og unom ka kaso

CEBU, Philippines - Duha ka kaso’ng kriminal ang gipasaka diha sa Cebu Provincial Prosecutor’s Office ug upat ka kasong administratiba ang giduso usab didto sa Regional Internal Affair Service (RIAS) batok ni PO2 Socrates Avila.

Si Avila gipasanginlan nga mition og armas ni Senior Inspector Cesar Misola, hepe sa Dumanjug Police Station.

Kaso nga reckless imprudence resulting in damage to property ug direct assault in a person in authority, conduct unbecoming of police officer, grave misconduct, less neglect of duty ug anti-graft and corrupt practices act ang mga kaso nga atubangon ni PO2 Avila.

Matud ni Misola nga magpadala unta siya og letter request ni PO2 Avila nga mo-report balik sa duty sa dili pa makonsiderar siya nga AWOL kon (absent without official leave) apan kalit lang mipatim-aw ang maong polis pipila ka adlaw human sa hitabo.

Ang polis nga si Avila gipasanginlang mi-duty nga nakainom niadtong Marso 20, ug mibiya sa iyang duty pagka desk officer. Walay pananghid nga gigamit ni PO2 Avila ang patrol car ug miadto sa Barangay Ilaya apan nadam-ag ang sakyanan sa road signage.

Si Avila gipasanginlan usab nga mibuhi sa piniriso nga si Zosimo Pace bisan og walay court order. Pagbalik ni Avila sa police station gitionan niya og armas ang hepe apan nakamaneho sa pagdagan.

Matud ni Misola nga nangayo og pasaylo kaniya si PO2 Avila apan wala kini makapausab sa iyang huna-huna ug kinahanglang atubangon ang maong mga kaso. (/BDB)(BANAT NEWS)