Basura sa Mandaue ilisan og mga makaon

CEBU, Philippines - Ang mga opisyal sa dakbayan sa Mandaue midasig sa mga lumolupyo sa kabarangayan paghipos sa mga ma-recycle nga mga basura kay mahimo na man kini’ng kapailisan og kagamitan sama sa asukar, sabon panglaba ug uban pa. Si Engineer Ricardo “Gaga” Mendoza nga maoy Solid Waste Management officer sa dakbayan miingon nga magsugod ang mao nilang programa sa usa ka barangay sa dakbayan nga ilang pilion nga pilot area.

Matud ni Mendoza nga kun ilang makita nga nagmalampuson ang mao nilang programa ilang himoon ang pagpakaylap niini ngadto sa tanang 27 ka barangay sa dakbayan. Si Mendoza mipasabot nga ilang nahuna-hunaan sa pagpasiugda sa maong programa aron pagdasig sa mga lumolupyo sa pagbahig sa ilang basura nga malata ug dili malata.

Ang basura nga sama sa botelya o basiyo sa mineral water, plastic bag, lata, puthaw o magamit pa nga mga karton o papel mahimo kining lainon paghipos ug dad-on sa lugar nga pagahimoon ang pag-ilis sa maong matang sa basura ug sa pagpauli maoy madala na niini ang kinilo nga asukar, pinutos nga kape, sabon nga panglaba o pangkaligo ug uban pa.

Ang madunot nga matang sa basura mahimo usab nga lainon sa paghipos kay magamit man kining abuno ug  ang dili na gayud kapuslan nga mga basura maoy kuhaon sa mga basurero alang sa paglabay na niini ngadto sa landfill.

Gipasabot ni Engineer Mendoza nga ang mga basura nga ilang matigom gikan sa giilis nilang sabon panglaba, asukar ug uban pa maoy ilang ibaligya ngadto sa manimbangay ug ang kuwarta gikan niini maoy  ilang gamiton sa pagpalit og supply sa commodities alang sa pagpadayon sa maong programa.  Si Mendoza miingon nga ilang gihimo ang maong programa sa dakbayan sa tumong sa pagpakunhod sa gidaghanon sa mga basura nga ilabay ngadto sa dumping area.  /RUB (BANAT NEWS)