Barbero gipusil patay

CEBU, Philippines — Patay ang usa ka barbero diha sa Sitio Mutra sa Barangay Tisa, Cebu City human kini gipusil sa tulo ka mga lalaki niadtong Biyernes sa gabii, Oktobre 16, 2026.

Nadakpan sad kagahapon adlaw nga Domingo, Oktubre 18, ang tulo ka suspek sa walay hunong nga hot pursuit operation sa diha na sa Aznar Street, Barangay Pardo, sa mga sakop sa Police Station 10 (PS10), kauban ang City Intelligence Unit (CIU), Criminal Investigation and Detection Unit (CIDU), Special Weapons and Tactics (SWAT), City Drug Enforcement Unit (CDEU) ug Police Station 7 (PS7).

Narekober sa operasyon ang usa ka kolor blue nga Yamaha FZ nga motorsiklo, usa ka kalibre .45 nga armas nga may upat ka bala, ug usa ka improvised shotgun nga naay bala.

Nakuha usab sa mga operatiba ang usa ka itom nga Spyder full-face helmet, usa ka violet ug orange nga sweatshirt nga may hood, ug usa ka itom ug puti nga jacket nga gikatahong maoy gisuot sa mga suspek pagpusil sa biktima.

Nakuhaan sad og video sa CCTV ang mga mamumuno nga gasuot sa maong mga ebidensiya atol sa paghimo sa krimen.

Biyernes sa gabii, gipusil patay sa mga suspek ang biktimang si John Paul Dayopay, 25, usa ka barbero ug lumad sa lungsod sa Badian, Cebu.

Sumala sa kapulisan, gipusil si Dayopay sa gawas sa iyang giabangan nga apartment.

Gitabangan siya sa mga paramedic sa barangay ug emergency medical services (EMS) personnel sa wala pa gidala sa Chong Hua Hospital , apan namatay ang biktima.

Sa pahayag ni Police Colonel Ricky C. Sumalde, direktor sa Cebu City Police Office (CCPO), dako kaayo og natampo sa kalamposan sa pagkasikop dayun sa mga suspek tungod sa pagtinabangay sa tanan.

Matud ni Sumalde, nagtinabangay ang mga yunit sa CCPO pagkadawat palang sa report sa pagpamusil hangtod sa pagdakop sa tulo.

Gipasidan-an usab niya ang mga nagplano sa pagbuhat og krimen nga dili sila makaikyas sa balaod ug manubag sila sa ilang mga binuhatan.

Ang tulo ka gidakop nga suspek gikatakdang pasakaan og kaso karong adlawa.

Sa pagkutlo ning balita, wala pay mahatag nga impormasyon ang kapolisan kun unsay motibo sa maong krimen ug mga impormasyon bahin sa tulo ka mga suspek.—  IBM BANAT NEWS