Libo kapin ka kawani sa City Hall dugay na nga nagserbisyo apan kaswal gihapon

CEBU, Philippines - Adunay 81 ka kawani sa kagamhanan sa dakbayan sa Sugbo nga bisan og nakaserbisyo na’g kapin sa 25 ka tuig apan sila nagpabilin nga kaswal.

Gibutyag kini ni Atty. Dominic Diño, ang hepe sa Human Resource and Development Office (HRDO), apan wala kaayo makahatag og rason si Diño kun ngano nga wala gayud mahimo nga regular ang mao nga mga kawani.

Pagka karon ang Cebu City Hall aduna’y 4,284 ka kawani   nga mas daghan kun itandi sa 4,131 ka kawani kaniadtong Disyembre 31.

Matud ni Diño nga duna sa’y 349 ka kawani sa City Hall nga kaswal gihapon bisan og nakaserbisyo na og 21 ngadto sa 25 ka tuig.

Aduna sa’y 328 ka kawani nga nagpabiling kaswal bisan og miserbisyo na og 16 ngadto sa 20 ka tuig sa kagamhanan sa dakbayan sa Sugbo.

Si Diño miingon nga laing 471 ka kawani ang nagpabilin gihapon nga kaswal bisan og nakaserbisyo na og 11 ngadto sa 15 ka tuig ug 536 ang kaswal gihapon bisan napulo ka tuig na nga nagtrabaho sa kagamhanan sa dakbayan.

Gitoohan ni Diño nga ang mao’ng mga kawani kuwang sa gikinahanglan nga educational attainment aron sila mahimong regular.

Matud ni Diño nga isugyot niya ngadto sa mga sakop sa Personnel Selection Board (PSB) nga kadtong mga kawani nga miserbisyo na og daghang katuigan himoon na nga regular. (BANAT NEWS)