Negosyante maoy ‘Suspek’ sa pagpatay sa kolektor

CEBU, Philippines - Gidakop sa kapolisan ang usa ka tawo nga suspetsado sa pagtulis ug pagpatay sa lending collector nga napalgang giputos ug gigaid sa luyong lingkoranan sa iyang motorsiklo nga giabandonar sa sitio Simborio, Barangay Tayud, lungsod sa Liloan niadtong Martes.

Ang gidakop mao si Julian Cervantes, 53, lumad nga taga Barangay Basak, lungsod sa Sibonga ug nanag-iya og tindahan sa pisa sa motorsiklo ug vulcanizing shop sa Sitio Capulay, Barangay Tayud, lungsod sa  Liloan.

Si SPO4 Windrey Pilapil sa kapolisan sa nahisgutang lungsod miingon nga sila si  SPO3 Marcelino Servilla ug SPO3 Roy Susvilla  maoy nihimo og follow up investigation sa kaso. Matud pa ni Pilapil nga gisuhid sa mga imbestigador ang mga kustomer sa nahisgotang lending firm nga gipaningil sa biktima niadtong Lunes hangtod nga nasuta nila nga si Cervantes maoy katapusan nga gipaningil niini.

Sa pag-adto nila ni Servilla sa tindahan ni Cervantes giingong duna sila’y nakit-ang  gituohan nilang patak sa mga dugo maong natahap sila nga posibleng may kalambigitan kini sa kamatayon ni Quijano, matud pa kusganon kining gihimakak ni Cervantes.

Si Chief Inspector Jose Liddawa, hepe sa kapolisan sa nahisgotang lungsod miingon nga nagtuo sila nga makakuha pa sila og dugang ebidensiya sa sulod sa gisirad-ang tindahan ni Cervantes nga makapalig-on sa ilang kaso.

Matud pa ni Liddawa nga nalangan ang ilang pagsulod sa tindahan tungod kay nagkuha pa man sila og search warrant sa korte apan nalangan usab ang pagluwat niini ang huwes tungod sa brownout kagahapong adlawa.

Gipasabot ni Liddawa nga gawas nga nalangan sila, nalangan usab ang pakisusi sa crime  scene sa mga sakop sa  Scene on Crime Operation (SOCO) sa PNP Crime Laboratory. (BANAT NEWS)