Radaza gusto bantayan g’yud ang kadagatan

CEBU, Philippines - Distinohan og polis ang Caubian Island aron masanta nila ang misiaw nga pagpangisda gamit ang dinamita didto sa mao nga lugar. Ang hepe sa kapolisan sa Lapu-Lapu nga si Senior Superintendent Rey Lyndon Lawas wala hinoon motataw kun permanente ba nga magbutang siya og detachment didto sa mao nga isla.

Giangkon hinoon ni Lawas nga maglisod ang iyang mga sakop sa paggukod sa mga dinamitero didto sa Danawon bank duol sa isla sa Caubian kay mosibat kini paingon sa Bohol luwan sa kusog kaayo managan nila nga pumpboat.

Nasayran ni Lawas nga dili lang ang mga mananagat sa Caubian ang nalambigit sa pagpangisda gamit ang dinamita kun dili lakip usab ang gikan sa atbang nga mga barangay sa Bohol.

Ang team sa PNP Task Force Kalikasan dakbayan sa Lapu-Lapu maoy moadto sa isla sa Caubian aron pagpahimangno ingon man pagtudlo sa mga mangingisda sa epekto sa illegal nga pagpanagat.

Pipila ka molupyo sa Caubian mibutyag nga daghan na kaayo nga mga dinamitero sa ilang dapit.

Samtang si Lapu-Lapu City Mayor Paz Radaza nangulo sa pakigpirmahay og kasabotan uban sa mga tag-iya og hotel, dive shops ug uban pa nga gitumong aron magprotiher sa kinaiyahan ilawom sa kadagatan sa isla sa Mactan.

Matud sa mayor nga ang gitawag og Kontiki Wall daan na kining atraksiyon sa Barangay Maribago panahon pa sa pag-abot ni Ferdinand Magellan ug nahimo na kining tourist diving attraction mao nga angay kini nga alimahan ug preserbahon.

Gihangyo ni Mayor Radaza ang tag-iya og mga dive shops, hotels ug resorts ingon man kadtong mahiligon sa pagsawom nga dili hilabtan ang kinaiyahan ilawom sa kadagatan.

Iyang gipasabot nga pasabton g’yud ang ilang mga sakop nga dili mopasipala sa kinaiyahan sa kadagatan aron dili sila mapasakaan og kaso sa paglapas sa lagda sa Department of Environment and Natural Resources (DENR), Fishery laws ug ordinansa sa Lapu-Lapu. Hangtod karon wala pa gihapon mahibaw-i kinsa ang mikulit og "RITCHIE" sa usa ka lapad nga gasang didto sa Kontiki wall.  (BANAT NEWS)