CEBU, Philippines - Gimando ni Cebu City Police Office director Sr. Supt. Noli Romana ang pag-imbestigar sa polis nga giingong hubog ug gipasanginlang nangulata og usa ka waiter sa restobar sa Osmeña Boulevard sa miaging gabii.
Ang maong polis giila nga si PO2 Hoseph Tabo-tabo nga nadestino sa Traffic Division sa Cebu City Police Office.
Usa ka Aljoe Bajamonte, 20, molupyo sa dalan B. Rodriguez, dakbayan sa Sugbo ug waiter sa usa ka restobar ang mireklamo nga gikulata siya sa maong polis diha mismo sa sud sa iyang gitrabahoan.
Apan nagkasinabot ang duha ka habig nga areglohon lang ang maong hitabo.
Apan si Romana miingon nga kinahanglang imbestigahon gihapon tungod sa kasong administratiba ni Tabo-tabo.
Sumala pa ni Romana nga bisan pa nga dili na interesadong mopasaka og kaso ang biktima mahimo gihapon moimbestigar ang PNP tungod kay miyembro sa ilang organisasyon si Tabo-tabo, bisan pa og off-duty kini atol sa hitabo
Nasikop ang maong polis pinaagi sa citizen’s arrest apan gibuhian ra kini sa Parian Police Station tungod kay mi-execute og affidavit of desistance ang biktima. (BANAT NEWS)