CEBU, Philippines - Napusilan sa kapolisan ang usa ka lalaki nga gitumbok nga tulisan atol sa hot pursuit operation kalabot sa pagpanulis nga nahitabo niadtong Lunes sa gabii diha sa barangay Cogon west sa lungsod sa Carmen.
Ang 17-anyos nga biktima mitug-an sa kapolisan nga siya ug ang iyang duha ka higala gitulis sa duha ka tawo nga nagsakay og motor.
Sumala pa nga ang maong mga lalaki mihunong sa ilang atubangan ug mideklarar og tulis ug gipanguha ang ilang mga cell phones.
Matud pa nga natumbok ang mga tulisan pinaagi sa rogues gallery sa kapolisan hinungdan nga gisubay sa mga polis ang ilang mga gitagoan.
Sumala pa nga gitumbok si Jordan Inojales ug ang igsuon niining si Roldan nga maoy mitulis kanila niadtong Lunes.
Apan atol sa maong operasyon gikatahong misukol nila si Rogelio Inojales Jr. maong napusilan kini ni PO3 Roger Delan. Matud pa nga gisanggot ni Rogelio si PO3 Delan apan nakalihay ug nakabawos pagpusil sa iyang tiyan.
Narekober gikan sa tulo ang usa ka motor nga skeleton nga gigamit sa mga suspetsado sa pagpanulis.
Natanggong sa Carmen Police Station ang duha samtang nalandig sa Vicente Sotto Memorial Medical Center.
Ang hepe sa Talisay City Police Station miawhag sa publiko nga magmatngon paggamit og mga Automated Teller Machine (ATM) aron dili mabiktima sa mga scammer.
Si Supt. Resty Santos mipasidaan nga dunay mga scammers nga magbutang og gamay’ng camera diha sa ATM machines nga dunay mga memory cards nga mo-store sa mga impormasyon sa cards lakip na sa personal identification number (PIN) code.
Giawhag niya ang publiko nga tan-awon una kung way kahibulongang mga gadget nga gibutang duol sa pislitanan sa keys nga posibleng scam gadget. (BANAT NEWS)