Amahan sa usa sa namatay sa bangga nangayo og hustisya

CEBU, Philippines - Hustisya ang gipangayo sa pamilya ni Cristy Marie Estella nga usa sa nakalas human kini mabanggai og awto sa barangay Poblacion sa lungsod sa Boljoon sa Huwebes sa hapon.

Si Cecilio Estella, 48, ang amahan sa biktima nga nahinabi sa Banat News miingon nga si Cristy Marie usa unta sa iyang gisaligan nga makatabang niya sa paghaw-as  sa ilang kahimtang.

Si Cecilio mananggiti ug pagpamuhi og hayopan ang iyang panginabuhi inabagan sa iyang asawa.

Sumala pa ni Cecilio nga ang iyang anak nga si Cristy usa ka working student ug nagtrabaho kini  isip katabang sa balay aron lang kini maka-eskwela.

Mogradwar na unta sa 4th year ang iyang anak karong Marso ug pangasaw-on na unta kini sa iyang uyab nga usa ka US Navy sumala pa ni Cecilio.

Miingon si Cecilio nga dihang nakahibawo sa gidangatan sa iyang anak ang pamanhunon niini mitiyabaw kini og maayo ug gusto pa unta niini madungog ang tingog ni Cristy Marie.

Gipaabot sa pamilya sa biktima nga moabot ang pamanhonon niini sa sunod nga semana sa dili pa kini ilubong.

Samtang dakong pagmahay sa manghod sa biktima nga si Christine Joy nga wala siya makig-estorya sa biktima nianang adlawa kay gipapauli kini niya og una.

Matud ni Christine Joy nga mihangyo unta diay ang iyang magulang nga makig-estorya kaniya kay duna siya’y importante nga tuyo nga dili niya masulti sa lain gawas lang sa iyang manghod.

Apan gibalibaran niya kay magklase pa sila sa P.E.mao na lay iyang nahibaw-an nga naapil ang iyang magulang sa disgrasya.

Misulay pa siya sa pag-adto sa lugar nga nahitaboan apan wala na didto ang iyang magulang ug didto na siya naabtan sa health center ug namatay samtang gidala sa tambalanan sa dakbayan sa Sugbo.  (BANAT NEWS)