Cash assistance sa mga senior ihatag na
CEBU, Philippines - Ang kapin sa 59,000 ka senior citizens sa dakbayan sa Sugbo hatagan na sa ilang ‘tag P3,000 nga hinabang-salapi gikan sa City Hall ugmang adlawa. Si Ester Concha, pangulo sa Department of Social Welfare and Services (DSWS), miingon nga ang pagpanghatag sa cash assistance adto kini himoa sa mga barangay.
Ang P2,000 sa P3,000 nga ipanghatag ngadto sa mga senior citizens ugma, maoy balanse sa kinatibuk-ang P10,000 nga cash assistance sa matag senior citizens. Ang laing P1,000 kabahin na sa cash assistance karong tuiga. Gipahimangnoan ni Concha ang mga senior citizens nga mosiguro gayud pag-adto sa ilang mga barangay hall o kaha sa ilang barangay sports complex aron pagkobra sa ilang hinabang-salapi.
Kadtong dili makakobra sa barangay, mahimong adto na sa City Treasurer’s Office (CTO) sugod unya sa Lunes apan kinahanglan nga dili molapas sa 15 ka adlaw.
Gitataw usab ni City Administrator Lucelle Mercado nga ang mga senior citizens wala na kinahanglana nga mokuha pa og cedula aron makobra nila ang cash assistance.
Nakabantay si Mercado nga daghang senior citizens nga naghasol lang gayud pag-adto sa City Hall aron molukat og cedula kay adunay misulti kanila nga dili mahatagan og hinabang-salapi ang walay bag-ong cedula. (BANAT NEWS)
- Latest
