P27.2 milyong shabu nasakmit

CEBU, Philippines — Gibanabanang upat ka kilong gidudahang shabu nga nagkantidad og P27.2 milyones ang nasakmit sa buy-bust operation sa Philippine Drug Enforcement Agency Region 7 (PDEA 7) ug Cebu City Police Office (CCPO) Station 7 sa Saint Jude Phase 2, Barangay Bulacao, Cebu City, alas 9:45 sa gabii niadtong Oktubre 9, 2026.

Tulo ka lalaki ang nadakpan sa operasyon nga gituohang kabahin sa pag-apod-apod sa ilegal nga droga sa Metro Cebu.

Giila ni PDEA 7 Regional Director Joel B. Plaza ang nag-unang target sa operasyon nga si alyas Joseph, 33, usa ka tindero og pagkaon ug residente sa Barangay Mohon, Talisay City, Cebu.

Nadakpan usab ang duha niya ka mga kauban nga sila si alyas Eduardo, 24, ug ang iyang pag-umangkon nga si alyas Harold, 25, nga parehong   mekaniko ug mga residente sa Datagon, Pamplona, Negros Oriental.

Base sa inisyal nga impormasyon sa PDEA 7, nagsugod ang operasyon human makadawat og impormasyon gikan sa usa ka confidential informant bahin sa pagpamaligya sa suspek og dinagko nga illegal nga drugas.

Gibana-bana nga usa ka semana ang gihimong case buildup sa mga operatiba sa wala pa gilusad ang buy-bust operation.

Sumala sa impormasyon nga nakuha sa mga otoridad, mokabat sa walo ka kilong  gidudahang shabu matag semana ang ilang maapud-apod sa Metro Cebu.

Narekober sa operasyon ang lima ka vacuum-sealed pack nga gidudahang shabu nga motimbang og kapin sa 4,000 gramos o upat ka kilo, nga adunay gibanabanang kantidad nga P27.2 milyones.

Nakuha usab sa mga operatiba ang buy-bust money, usa ka sedan, duha ka cellphone ug uban pang ebidensiya nga dili droga.

Matud ni Eduardo, gisugo lamang sila sa pagkuha sa giingong shabu nga iyang gitawag og “basura.”

Dugang pa niya, gibayran siya og P15,000 ug dili moubos sa lima na ka higayon silang miari sa Sugbo para sa pagkuha sa maong giingong ilegal nga droga.

Ang mga nakumpiskar nga drug evidence gisumitir na sa PDEA 7 Regional Office Laboratory.

Samtang, anaa na sa temporaryong kustodiya sa PDEA 7 sa Lahug, Cebu City ang tulo ug gikatakdang pasakaan og kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.