Gidudahan kinawat nga kinahong sabon gibiyaan

CEBU, Philippines - Napulo ka kahon nga sabon ug shampoo nga gituohang mga kinawat ang giabandonar sa daplin sa dalan R. Colina sa barangay Guizo sa dakbayan sa Mandaue alas-6 pasado ang takna sa miaging gabii.

Si Edwin Ermac nga maoy executive officer sa Traffic Enforcement Agency of Mandaue (TEAM) nga nahinabi sa Banat News miingon nga  usa sa iyang traffic enforcer nga si Cristito Pablo maoy nakakaplag niini.

Gitugyan na nila ngadto sa kapolisan sa Presinto 1 sa Mandaue City Police Office (MCPO) sa barangay Centro sa pagsiguro nga makuha kini sa tag-iya.

Si PO2 Jesson Estrera sa kapolisan sa Presinto 1 nga nahinabi sa Banat News miingon nga duha pa ka karton ang nakuha sa nagpaila nga si Hilario Iyog, nga nagpailang tag-iya ug nakapakita og mga resibo niini.

Matud ni Estrera nga gitug-an ni Pablo nga nakabantay siyang gidiskarga kini sa duha ka mga lalaki gikan sa usa ka sakyanan apan pagkakita kaniya mikaratel sila og panagan ug mipabulhot usab og padagan ang sakyanan.

Apan nahibulong si Pablo nga gikan sa alas-6 sa gabii hangtud na alas-10  sa gabii wala gihapon kini balika hinungdan nga gitugyan nila kini sa kapolisan.

Nagtuo si Ermac nga mga kawatan ang maong mga tawo nga nagdiskarga sa maong mga kinahon nga sabon ug shampoo.(Romeo T.  Limpangog/EIM)

Hapon mihasi sa kababayan gidakop

Sa prisohan napunta ang usa ka Hapon human kini ireklamo sa manag-amahang kaparehas niyang Hapon  nga nangayo og police assistance tungod sa pagpanghagis niini diha sa barangay Banilad, dakbayan sa Mandaue a sa miaging kaadlawon.  Ang gidakop mao si Eiji Wada, 34, temporaryong nagpuyo sa maong dapit samtang ang mireklamo mao ang manag-amahang sila si Junko Sato, 38, ug ang 17-anyos nga anak niini nga nagpuyo usab sa maong dapit.

Si PO1 Ronald Saba ug PO1 Michael Mata sa kapolisan sa Presinto 4 sa Mandaue City Police Office (MCPO) miingon nga gisulong sa suspetsado ang manag-amahan ug nanghagis.

Gisuwayan unta pagbadlong ang maong suspetsado sa amahang Sato apan gibunlot ug gisukmag kini sa suspek hinungdan nga miresponde ang anak ni Sato ug gilamba si Wada ug gituok.

Ang mga silingan na maoy mitawag sa kapolisan ug gidakop si Wada. Ang duha gidala sa Mandaue City Hospital diin gipatambalan sa iyang samad sa nawong ang amahang Sato ug gipailawom sa liquor test si Wada  nga nasutang positibo kining hubog. (BANAT NEWS)