CEBU, Philippines - Usa ka lalaking nangangkong polis ang gipasanginlang nanghulga og caretaker sa usa ka taxi company nga nahimutang sa barangay Dumlog, dakbayan sa Talisay niadtong Sabado sa hapon.
Ang biktima mao si Zosimo Lastimosa, 58, caretaker sa MRG taxi mipasangil kang Omar Macaracat nga mihulga kaniya.
Base sa imbestigasyon sa kapolisan sa Talisay nga giingong si Macaracat kalit kining mitungha diha sa ilang kompaniya ug nagpaila sa iyang kaugalingong usa ka polis apan wala matala diha sa blotter sa kapolisan kung asa madestino si Macaracat.
Si Lastimosa namasangil nga sa walay igong rason gihasi siya ni Macaracat kinsa maisogong mimando kaniyang paablihan ang gate.
Matud ni Lastimosa nga nagdumili siya sa pag-abli sa gate tungod sa security reason apan giingong ang suspetsado nanghulga kaniya nga nagkanayon “bantay ka og mogawas ka diha!.â€
Sa kahadlok ni Lastimosa dali kining mi-report ngadto sa Talisay City Police Station sa maong insidente. Ang maong lalaki wa na igkita pa.(Brenda D. Batuto/EIM)
Mga smuggled vehicles ipaguba sa BOC
Gimando ni Bureau of Customs Commissioner John Philip Sevilla nga ipaguba ang mga sakyanan nga nakumpiskar sa BOC Port of Cebu nga nagtipun-og lamang sud sa Cebu International Port o CIP sa dugay nga panahon.
Matud pa ni Cebu Customs District Collector Roberto Almadin atol sa pagbisita ni Sevilla sa milabay’ng semana gimando sa ilang labaw nga ipaguba ang tanang mga chop-chop ug kompletong sakyanan nga nakapahuot sa bodega sa BOC-POC sud sa CIP.
Si Sevilla nagkanayon nga base sa balaod, ang tanang mga kontrabando o smuggled items dili gyud mahimong isubasta o mabaligya ngadto sa publiko ug kung kinahanglan ibalik kini kung hain gikan.
Apan tungod kay pulos na man kini giabandonar buot ni Sevilla nga ipaguba na lang ang tanang mga sakyanan nga anaa sa CIP gumikan sa kahuot na sa maong dapit.
Si kanhi Customs Police District Commander Maj. Camilo Casculan Jr. mibanabana nga mokabat sa P100 milyones ang 400 ka mga motorsiklo nga anaa karon sa CIP.
Ang maong mga sakyanan anaa mahimutang sa hawan nga dapit diin maulanan ug mainitan hinungdan nga kini gipangtaya na ug mura na og basura. (BANAT NEWS)