Duha ka tawo gipatay sa managlahing dapit

CEBU, Philippines - Duha ka tawo gipatay; usa kanila ang gidakdakan og bato ug ang usa gidunggab sa managlahing lugar sa Sugbo.

Gidunggab patay ang usa ka lalaki samtang kini nag-inom sa UBCA 3, barangay Quiot sa dakbayan sa Sugbo sa alas 9:30 sa gabii niadtong Lunes. Ang biktima naila nga si Richard Espinosa, 35, taga Cabreros, barangay Basak San Nicolas sa dakbayan sa Sugbo.

Samtang ang suspetsado naila nga si Allen Tumarong, 32, molupyo sa maong dapit nga giingong kalit mibutho sa dapit diin mag-inom ang biktima ug tulo niya ka mga higala.

Matud pa diretso nga gidunggab sa suspek ang biktima diha sa iyang likod ug mikaratel og dagan apan nadakpan sa mga tanod ug naembargo gikan kaniya ang nagkadugo pa nga kutsilyo.

Namatay si Espinosa sud sa Vicente Sotto Memorial Medical Center samtang kini giatiman sa mga doktor.

Samtang patay nang napalgan ang usa ka lalaki nga gikan nag-inom kuyog sa iyang mga ig-agaw sa sitio North Guinabasan, barangay Tubigagmanok sa lungsod sa Asturias.

Ang namatay naila nga si Arsenio Buhawi Narra, taga sitio Sangi sa nahisgutan nga barangay.

Base sa report sa kapolisan sa lungsod sa Asturias nga ang biktima gitabangan og kulata sa pipila ka tawo ug nakadagan pa kini 150 metros sa lugar apan duna na diay nag-atang kaniya ug didto gidakdakan kini og bato sa ulo nga maoy nakaingon sa iyang kamatayon. Matud pa sa report sa kapolisan, ang biktima nalambigit sa pipila ka insidenti sa lungkab sa maong dapit. (BANAT NEWS)