“Nag-plano” pagpatay sa bise mayor himuong state witness

CEBU, Philippines - Andam nga mo-cooperate sa kapolisan ang lalaki nga gikatahong nalambigit sa plano nga pagpatay kang Bise Mayor Joel Dumdum sa lungsod sa Asturias.

Matud ni Archie Alvarado nga andam siya nga mokooperar sa kapolisan apan gihimakak niini nga apil siya sa planong pagpatay ni Dumdum.

Si Alvarado miingon nga bag-o lang niya nailhan ang napatay nga si Edgar Escalante (dili ang reporter sa TV) ug si Jonathan Rubi nga samdan sa iyang tiil.

Ang hepe sa Provincial Intelligence Branch (PIB) nga si Supt. Rodolfo Albotra miingon nga migawas ang ngalan ni Alvarado base sa pamahayag ni Rubi ug sa ebidensya nga nakuha nila sa iyang celphone.

Apan matud ni Albotra nga ang kasayoran ni Alvarado kutob lang sa pagplano. Matud ni Albotra nga pagkakaron plano nila nga himuong state witness si Alvarado tungod kay gamay ra man ang iyang partisipasyon sa krimen.

Matud pa ni Albotra nga duna pa sila’y duha ka tawo nga giimbitar ug giimbestigar apan ila kining gibuhian tungod kay ilang nasuta nga wala kini kalambigitan sa planong pagpatay ni Dumdum.

Si Alvarado nasikop usa ka adlaw human nakigpinusilay si Escalante sa kapolisan sa barangay Nangka, Balamban hinungdan sa iyang kamatayon.

Si Rubi nasikop ‘sab sa kapolisan ug naangol kini sa iyang tiil human sa pinusilay sa barangay Poblacion, Asturias.

Naghulat na lang si Albotra nga mohimo si Alvarado og extra-judicial confession ug iya kining pirmahan aron mahimo siyang state witness.

Nagtuo si Dumdum nga may labot sa politika ang planong pagpatay kaniya. (/EIM)(BANAT NEWS)