Sunog miugdaw’g kapin sa P700 mil

CEBU, Philippines - Kapin sa P700 mil ang danyos sa sunog nga miigo sa managlahing lugar sa lalawigan sa Sugbo kagahapon  sa kaadlawon  ug miaging adlaw.

Ang  naugdaw  mao  ang  YY Company building  nga  nahimutang  sa dalan  high  Seno,  sa barangay  Guizo, dakbayan sa Mandaue  kagahapon  sa alas 12:05  sa tungang  gabii.

Samtang mikantidad  usab  og  P100 mil   ang balay ni Garry Trinidad, sa dalan  Rizal,  barangay  Suba, dakbayan  sa Danao nga  nasunog  sa miaging alas 6:50  sa buntag.

Si SFO1 Julius Lloa, imbistigador  sa Bureau of Fire  Protection sa dakbayan sa Mandaue mibutyag  nga may kalagmitang  mosubra  pa  sa P600 mil  ang  kantidad  sa naugdaw  nga  edipisyo sa YY  Company ug  mga  baligya nga  mga  heavy equipment  sa sulod  niini kun  makuwenta  na  ang  tanang  kadaot.

Gideklarar ubos  sa Task Force Alpha (TFA) mitabang sa pagpawong sa maong  sunog  ang  mga  bombero  sa dakbayan  sa Sugbo,  Lapu-Lapu, lungsod sa Consolacion, Filipino  Chinese  Fire  Volunteer  Brigade  ug Emergency Rescue Unit  Foundation (ERUF). Midugang  si  SFO1 Lloa  nga  naugdaw  gyud  ang  tibuok  building sa YY Company  tungod  kay  sirado  ang  pultahan  niini  ug  wala  makaagi  ang  mga  bombero  pagtion  sa hose  sa  tubig  batok  sa kayo.

Gisuta  pa  sa kabomberohan  ang  hinungdan  sa  maong sunog.

Samtang  ang  balay  ni Trinidad  giingong  faulty  electrical  wiring  ang  hinungdan  sa pagsilaob  sa kayo  nga  miugdaw  sa iyang  puloy-anan.

Dugang niini, mikabat  usab  sa P30 mil ang  kantidad  sa naugdaw  nga  balay  sa magtiayon nga  Juanito ug Roda Luage sa barangay Suba sa lungsod sa Samboan pasado alas 11:00 sa miaging buntag.

 Base sa imbistigasyon nga gihimo ni SFO2 Molilito Leceña  nga ang kayo nagsugod sa kwarto sa managtiayon.

Matud pa nga posibli nga ang hinungdan sa maong sunog mao ang anak sa magtiyaon nga 5-anyos nga gikatahong nagduwa og posporo. Way naluwas nga  mga  butang  ang magtiayon kay  naabo  ang tanan sa  kayo. Hinuon  ang balay  sa ilang  ginikanan  nga  igo  lang  gipahakan  sa kayo  mikantidad  og  P5 mil  ang  kadaot. (BANAT NEWS)